الشروط والأحكام: خدمات المتابعة الغذائية

آخر تحديث: 18 أكتوبر 2026

الشروط دي بتنظّم الاشتراك في باقات المتابعة الغذائية من NutriOmar. بالدفع والاشتراك في أي باقة، تكون قريت الشروط دي ووافقت عليها.

1. تعريفات

• NutriOmar: مقدّم الخدمة، د. عمر حسام وفريقه الطبي.
• المشترك: الشخص اللي دفع واشترك في باقة.
• الباقة: Elite أو Prime، بمدة 3 شهور أو 6 شهور.
• مكالمة التقييم: أول مكالمة بعد الاشتراك، وفيها التقييم الكامل للحالة.
• أول يوم في الاشتراك: يوم مكالمة التقييم. ومنه بتتحسب مدة الاشتراك، ومدة ضمان الخدمة، ومواعيد الفريز.

2. الاشتراك وبدايته

• الاشتراك بيتأكد بعد استلام المبلغ كامل، أو الدفعة الأولى في حالة الدفع على دفعتين.
• المشترك يقدر يحدد ميعاد مكالمة التقييم في أي وقت خلال 3 شهور من تاريخ الدفع.
• لو ماتحددش ميعاد مكالمة التقييم خلال الـ3 شهور، الاشتراك بيبدأ تلقائيًا في آخر يوم منهم.
• النظام الغذائي المكتوب بيوصل خلال 24 ساعة من مكالمة التقييم.
• الاشتراك شخصي، ومينفعش يتحوّل لشخص تاني.

3. الأسعار والإقامة

• الأسعار بالجنيه المصري مخصصة للمقيمين داخل مصر فقط. أما للمقيمين بالخارج وغير المصريين، فالسعر المخصص مختلف بالدولار.
• لو تم الدفع بالجنيه من مقيم بالخارج أو من غير المصريين، يحق لـ NutriOmar تعديل عملية الدفع للدولار وطلب فرق السعر قبل بدء المتابعة.
• أسعار الخصم سارية لفترة محدودة، ومن حق NutriOmar تنهي الخصم أو تعدّل الأسعار في أي وقت. والتعديل ده مش بيأثر على أي اشتراك اتدفع قبله.
• السعر اللي اتدفع ثابت لمدة الاشتراك ده. وأي تجديد بيكون بالسعر الساري وقت التجديد.

4. الدفع على دفعتين

• متاح الدفع على دفعتين متساويتين، والإجمالي على دفعتين أعلى بنسبة 5% من الدفع مرة واحدة. والمبالغ بالظبط موضحة في صفحة الدفع.
• الدفعة التانية مستحقة بعد 30 يوم من تاريخ الدفعة الأولى، مهما كان ميعاد بداية الاشتراك.
• لو الدفعة التانية ماتدفعتش في ميعادها، المتابعة بتتوقف لحد ما تتدفع، من غير أي غرامة تأخير. ومدة التوقف دي بتتحسب من مدة الاشتراك.
• الفريز مش بيغيّر ميعاد الدفعة التانية.

5. الفريز (الإيقاف المؤقت)

• Prime: فريز مجاني لحد مرتين، بإجمالي لحد 14 يوم في اشتراك الـ3 شهور، ولحد 30 يوم في اشتراك الـ6 شهور.
• Elite: فريز مجاني لحد 3 مرات، بإجمالي لحد 21 يوم في اشتراك الـ3 شهور، ولحد 45 يوم في اشتراك الـ6 شهور.
• أقل مدة للفريز الواحد 5 أيام.
• الفريز متاح بعد أول 14 يوم من أول يوم في الاشتراك.
• طلب الفريز بيكون على الواتساب قبل بدايته بـ 48 ساعة على الأقل، من غير ما تحتاج تقول السبب.
• أيام الفريز بتتضاف على آخر الاشتراك.
• خلال الفريز المتابعة اليومية بتقف، والنظام المكتوب بيفضل معاك.
• في Prime: لما ترجع، بتراجع حالتك وخطتك مع أخصائيتك.
• في Elite: قبل الفريز د. عمر بيكلمك ويعرّفك تمشي إزاي، وخلاله معاك لأي سؤال، ولما ترجع بتتكلموا تاني.
• تقدر ترجع قبل نهاية الفريز، بشرط تبلّغ قبلها بيوم.
• أيام الفريز اللي ماتستخدمتش مابتتحولش لفلوس، ومابتتنقلش لاشتراك تاني.
• الظروف الصحية الطارئة، زي عملية جراحية أو مضاعفات حمل أو دخول مستشفى، بتتقيّم حالة بحالة، ومن حق NutriOmar تمنح مدة إضافية.

6. ضمان الخدمة

بنوعدك بالآتي، والضمان مرتبط بتنفيذ الوعود دي:

1. نظام مخصص مبني على تقييمك، مش نموذج جاهز.
2. النظام يوصلك مكتوب خلال 24 ساعة من مكالمة التقييم.
3. رد سريع على الواتساب طول اليوم.
4. أخصائيتك بتبدأ المتابعة معاك من غير ما تستنى تسأل.
5. مكالماتك في ميعادها: في Prime مكالمة كل 10 أيام، وفي Elite مكالمات مع د. عمر حسب احتياجك.
6. في Elite، د. عمر معاك بنفسه من غير وسيط.

7. الاسترداد

• تغيير الرأي: لو غيرت رأيك خلال 14 يوم من تاريخ الدفع وقبل مكالمة التقييم، فلوسك ترجعلك كاملة. وبعد الـ 14 يوم، أو بعد مكالمة التقييم، مفيش استرداد لمجرد تغيير الرأي، واشتراكك بيفضل محجوزلك.
• أول 14 يوم من الاشتراك: لو أي وعد من وعود ضمان الخدمة ماتنفذش، فلوسك ترجعلك كاملة.
• بعد أول 14 يوم: لو حصل إخلال بوعد واتبلّغ، وماتصلحش خلال 48 ساعة أو اتكرر، بيرجعلك باقي المدة اللي ماستخدمتهاش، محسوب بالأيام.
• في حالة الدفع على دفعتين، الاسترداد بيتحسب على المبلغ اللي اتدفع فعلًا.
• الطريقة: البلاغ بيكون على رقم واتساب NutriOmar الرسمي، والفريق عنده 48 ساعة يصلح. ولو ماتصلحش، الفلوس بترجع بنفس طريقة الدفع خلال 7 أيام عمل.

8. المتابعة والتواصل

• المتابعة فردية على الواتساب، مش جروب.
• المكالمات بميعاد متفق عليه. ولو المشترك فاتته مكالمة من غير ما يبلّغ، بيتحدد ميعاد بديل حسب المتاح.
• المشترك بيبعت متابعته وبياناته بانتظام، عشان الفريق يقدر يتابع ويعدّل الخطة صح.
• رقم واتساب NutriOmar الرسمي: +201033627141

9. الخصوصية والبيانات

• بياناتك وتحاليلك وصورك مايشوفهاش غير الفريق الطبي اللي بيتابعك.
• صور المتابعة اختيارية، ومن حقك ترفض.
• مش بننشر أي صور أو نتايج غير بإذن صريح منك، ومن غير اسمك أو أي بيان يعرّف بيك.

10. إخلاء المسؤولية الطبية

• المتابعة الغذائية أونلاين مش بديل عن الكشف الطبي المباشر لما يكون مطلوب، ومش بديل عن الطوارئ. في أي عرض طارئ، لازم تتوجه لأقرب طوارئ فورًا.
• المشترك مسؤول إنه يبلّغ بصدق وبالتفصيل عن حالته الصحية، وأدويته، وأي حمل أو رضاعة، وأي تغيير يحصل أثناء الاشتراك. لأن النظام بيتبني على البيانات دي.
• أي تغيير في الأدوية بيتم بتوجيه من د. عمر أو من الطبيب المعالج بس، ومايتمش من المشترك لوحده.
• النتائج بتختلف من حالة لحالة، وبتعتمد على الحالة الصحية والالتزام. وضمان الخدمة مرتبط بتنفيذ وعودنا، مش بنتيجة رقمية محددة.

11. إنهاء الاشتراك من ناحية NutriOmar

• من حق NutriOmar تنهي الاشتراك في حالة الإساءة للفريق، أو إساءة استخدام الخدمة، أو تقديم بيانات غير صحيحة بشكل متعمد. وفي الحالة دي بيرجع باقي المدة اللي ماتستخدمتش.

12. تعديل الشروط

• الشروط دي ممكن تتحدّث، والنسخة الأحدث دايمًا منشورة على الموقع.
• كل اشتراك بيمشي على الشروط اللي كانت سارية وقت الدفع.